BUTUAN CITY – Wala na maka-ipsot pa ang duha ka drug personality human sila nasikop sa gihimong anti-illegal drugs operation kaganinang ala-1:02 sa kaadlwaon sa may Purok 5, Sitio Damayan, Brgy Libertad ning siyudad sa Butuan.
Naila ang mga nadakpan nga sila alyas Mokoy, 38-anyos, duna’y ka-ipon, residente sa maong lugar ug si alyas Jojo, 39-anyos, duna’y ka-ipon, usa ka waiter ug residente a Purok 8, Sitio Malalag sa susamang barangay.
Nakuha gikan sa ilang posisyon ang usa ka sachet sa suspected shabu nga mao ang buy bust item; laing upat ka sachets sa susamang epektos, usa ka ₱1,000.00 nga tinuod nga kwartang papel ug laing upat ka susamang kantidad sa peke nga kwarta.
Gibana-banang mitimbang og 10-gramos ang nakuhang mga epektos nga mukantidad og ₱68,000.00.
Gikostudiya na sa Regional Drug Enforcement Unit-13 ang mga nadakpan alang sa tukmang disposasyon.
