BUTUAN CITY – Klarong cover up ang katapusang hearing sa Senate Blue Ribbon Committee bahin sa imbestigasyon sa mga anumalusong flood control projects.
Sumala ni Engineer Dioric Gavino, Secretary General sa Sara All Movement, naklaro kini dihang gipangutana ni Senador Rodante Marcoleta ang mga state witnesses kondiin pirme lang nga si Senador Ping Lacson ang motubag ug dili ang duha ka gika-ingong staff sa balay ni kanhi House Speaker Martin Romualdez.
Matud ni Gavino, sayon ra unta pagpangita sa tinuod nga accountable ug dili kinahanglan nga iduot pag-ayo ang mga contractors ug Department of Public Works and Highways kon DPWH, kung wala’y gihimonmg cover up komite.
Natural ra ang reaksyon sa mga contractors, apan ang tinuod nga liable sa tanan mao ang nag-aproba sa mga proyekto.
Dugang pa ni Gavino, gidula‑dulaan ra sa administrasyon ang katawhan tungod kay drama‑drama ug ilad‑ilad ra ang nahitabo karon sama sa impeachment complaint batok kang President Ferdinand Marcos Jr.
Gidasig usab niya ang katawhan nga dili magpadala sa kwarta nga ipanghatag matag eleksyon, o kung dawaton man kini, botohan gihapon ang angayan nga kandidato. Kay sa katapusan, kita ra gihapon ang mag‑antos kung magpadayon ang daot nga sistema.
