BUTUAN CITY – Nabalaka karon ang mga ginikanan sa mga grade 10 students sa Capalayan National High School sa Brgy. Capalayan, Surigao City tungod sa posibilidad nga usa sa ilang mga anak ang mamatay adiser mu-graduate sa junior high karong tuiga.
Kini human nga mitukar na usab ang tinuig nga pagka-possess sa pipila ka mga estudyante nga mao matud pa’y sinugdanan sa na-andan nang tinuig nga pagkuha og usa sa mga graduating students.
Sa eksklusibong pakighinabi ning sibyahan, gibutyag ni Kagawad Alex Cellona nga ning mi-aging tuig lang wala’y nakuhang estudyante ang mga dautang espiritu o kaha linalang human nga nagpahigayon sila og pray over alang sa mga graduating students.
Gani ning tuiga, nanguha sila og mga manambalay nga taga-Siquijor aron unta mahatagan og proteksyon ang ilang mga estudyante gikan sa mga dautang espiritu nga posibleng musamok kanila.
Wala nila damha nga ang pagpatawag nila og mga manambalay mao diay ang subling magpalawgaw sa ilang dapit ilabina sa maong tunghaan human nga mi-abot sa pito ka mga graduating students ang gipang-possess kon nasudlan og dautang espiritu.
Gani, usa sa mga na-possess nga estudyante ang gisakay sa motorsiklo dihang nahuwasan aron unta patambalan sa kasikbit nga Brgy. Mapawa apan nabun-og na hinuon kini human nasulog sa motorsiklo dihang subling na-possess.
Aminado si Konsehal Cellona nga dili siya mutuo og ingon niini nga panghitabo kaniadto apan dihang iya kining nasaksihan ilabina ang gipangsulti sa mga na-possess nga kuhaon ang iyang anak.
Tungod kay nagsingabot na ang graduation ceremony, plano sa kadumalahan sa maong tunghaan uban nilang mga stakeholders, nga ipa-pray over ang maong mga estudyante.
Nag-eskedyol na sila nga makigkita sa exorcist nga pari sa Brgy. San Juan aron matambagan sa angayan nilang buhaton aron dili na mamatyan pa og graduating student ang nasangpit nga tunghaan. (Beth Ruiz)
