BUTUAN CITY – Nangayu ug pasaylo si Ka Otto ang nagpailang tigpamaba sa Guerilla Front Committee 16 sa New People’s Army kon NPA sa gihimung pagpangatake sa ilang kaubanan sa niaging adlaw sa Gigaquit, Surigao del Norte nga gikamatay sa usa ka pastor samtang samaran ang laing duha ka sibilyan.
Kini dungan sa pag-angkon niini nga dakong sipyat ang pagpamanhig sa iyang kaubanan sa may Sico-sico Bridge, Brgy Lahi, diin napatay on the spot si Pastor Jepti Acedo, 32 anyos residente sa Brgy. Tayaga, lungsod Claver sa suSamang lalawigan samtang angol usab sila Virgil Flor Ortiz, 23-anyos residente sa lungsod sa Claver og si Abner Malaque, 20-anyos, residente sa Brgy. Villa Franca sa lungsod sa Gigaquit.
Misaad kini nga tubagon ang tanang panginahanglanon sa kabanay og pamilya sa mga biktima.
Sumala pa ni Ka Otto nga nagpadayon karun ang ilang imbestigasyon aron masuta ang tinood nga hinungdan kung nganung ang sibilyan man hinoon ang na-igo sa ilang target nga pagpangatake.
Ugaling mapamatud-ang dunay dakong kaakuhan ang iyang mga kaubanan, mag-atubang matud pa kini sa tukmang silot og disiplina.
Gipasabot nalang ni Ka Otto nga dunay ilang unit sa maong lugar tungod na usab sa padayong gihimung COPD sa kasundaluhan og padayong Human Rights Violation.
