BUTUAN CITY – Dakong problema ang gihambin karon sa usa ka manaya-ay og lotto human nga gilimod matud pa sa PCSO sales representative ang iyang gitunol nga ticket alang sa pagsusi sa mga numberong iyang nadag-ang Megalotto 6/45 niadtong Hulyo 17 sa gabii.
Base sa reklamo ni Joram Lumictin Pagaran, 38-anyos, ulitawo og residente sa Brgy. Soriano, Cabadbaran City, lalawigan sa Agusan del Norte, mitaya siya ning mi-aging Huwebes sa gabii sa number combination nga 8-11-25-33. 43 og 45 nga maoy migawas nga mananaog.
Kagahapon sa alas-9:00 sa buntag, midalikyat siya sa PCSO lotto outlet dapit sa Gee Pharmacy sa may E. Luna St., Brgy. Sikatuna ning siyudad aron ipa-check kung insakto ba ang maong mga numbero kondiin nadunggan pa niini ang mga pulong nga ‘Congratulations.’
Apan dako na lang ang iyang kadismaya tungod kay dihang iya nang gikuha og balik ang ticket nga mao matud pa’y iyang gipatan-aw sa sales representative nga duna’y agent number 13013161, milimod kini dayong butyag nga wala siya makadawat sa maong ticket.
Bisan pa man sa iyang pagpamugos samtang hugot usab ang paglimod sa wala pa mailang sales representative, dinhi na siya nagpatala sa Butuan City Police Station 1 alang sa tukmang pag-aksyon.
