BUTUAN CITY – Aminado ang grupong Sara All Movement nga duna’y mga walhon nga musabay sa ilang himuong rali ugmang adlawa batuk sa mga opisyal sa gobyerno nga nalambigit sa kurapsyon ug maoy ilang gipanawagang patubagon sa salaud ug palagputon.
Kini ang tubag sa secretary general sa maong grupo nga si Engr Dioric Gavino, human na-obserbahan nga ang mga militanteng grupong nagrali sa kauluhan ning mi-aging mga adlaw, wala nanawagan sa mga magbabalaud nga nalambigit sa kurapsyon sama nila Congressman Zaldy Co ug sa mikanaug nga si kanhi House Speaker Martin Romualdez ug hinuon, nanawagan alang sa pagpa-impeach kang Vice President Sara Duterte ug pagpatubag usab kang Rep Paolo ‘Pulong’ Duterte.
Sigon ni Gavino, mukabat matud pa sa 3-mil pisos ang suhol nga gipanghatag ngadto sa matag-indibidwal nga mu-apil sa rali sa mga leftists nga mulungtad pa ang sinuhulay ugmang adlawa.
Wala matud pa kini angayang kabalak-an tungod kay ang maong grupo, didto lang sa kauluhan ug wala sa Visayas ug Mindanao. Ugmang adlawa matud pa masayran kung asa nga grupo ang duna’y pinakadaghang panon, tali niadtong nanawagan alang sa hingpit nga ka-usaban ilabina sa liderato sa kagamhanan o kaha kadtong panon nga igo lang gipangsuhulan.
Gipasabot usab sa opisyal nga si Vice President Sara Duterte ang ilang gipanawagang i-impeach o mukanaog sa pwesto tungod kay nasayod na matud pa ang maong grupo nga kung si VP Sara ang mahimong sunod nga pangulo, siguradong mapuhag na usab ang ilang grupo.
Kini ilabina nga hugot nga baruganan sa besi presidente nga papason ang mga rebeldeng grupo nga maoy salot sa katilingban tungod sa kanunay nilang pagsabwa og kagubot.
Ang lugar matud pa nga tapukan niadtong tinud-anay nga mag-asdang sa kabag-uhan, matapok sa Liwasang Bonifacio ug dili sa Luneta Park nga maoy tapukanan matud pa sa mga sinuhulan.
