BUTUAN CITY – Bisan og hapit madedbol, gihangyo ra gihapon sa usa ka bana ang mga pulis sa Impasug-ong, Bukidnon nga pagawason gikan sa pagkapriso ang iyang asawa kinsa aksidenteng nakatigbas sa iyang ulo ning mi-aging adlaw.
Nasayrang nagsige matud pa og yawyaw ang banang si alyas Pedro dihang wala dayon mahipos sa asawa niining si alyas Tutay ang iyang manok nga pangtari rason nga dihang naglagot na, gikuha niini ang ilang sundang nga duna’y sakuban ug gibunal sa ulo sa iyang bana.
Aksidente matud pang nalabay ang sakuban rason nga ang sundang gayod ang mi-abot sa ulo sa biktima hinungdan nga dali kining gidala sa ospital ug gitahi ang tinigbasan.
Human ang pagpatambal, mibalik sa police station ang biktima ug gihangyo ang mga pulis nga pagawason ang iyang asawa rason nga igo na lang misunod ang mga pulis.
