BUTUAN CITY – Naghanyag na og 20-mil pisos nga reward ang pamilya sa 9-anyos nga batang si Maria Alleyah Jarezah Te, niadtong makatudlo sa nahimutangan niini nga musangpot sa pagbalik niini ngadto sa iyang pamilya sa Purok 17, Cigla Village sa Brgy Los Angeles ning siyudad sa Butuan.
Kini human nga hangtud karon, wala pa gihapo’y impormasyon nga nadawat ang iyang mga kabanay sukad nga katapusan kining nakit-an ning mi-aging gabii nga mi-uban sa usa ka hamtong na lalaki padulong sa Sitio Lucsuhon sa susamang barangay.
Nasayrang kagabii, gitabangan na pagpangita sa mga residente og mga opisyales sa maong barangay ang bata kondiin apil sa gisuhid ang mga sagbutong bahin sa maong lugar.
Una nang gipadayag sa eksklusibong pakighinabi sa Bombo Radyo Butuan, ni Kagawad Oscar Camarines nga gibalewala ang matud pa sa pipila nga nakakita sa biktima nga mi-uban kini sa hamtong nga lalaki tungod sa pagtuong kaila niya kini.
Mi-aksyon na lang sila og kabalaka dihang wala na maka-uli ang biktima sa pinuy-anan sa iyang uyuan nga gwardiya hangtud sa pagkutlo niini nga balita rason nga mihimo na sila og lakang aron pangitaon kini.
