BUTUAN CITY – Subling gipamatud-an sa Team USA nga takos sila sa korona sa men’s basketball sa Olympiada human nga giparot na usab niini ang Team France sa Gold Medal bout ning kadlawon, oras sa Pilipinas pinaagi sa iskor nga 98-87.
Kini na ang ikalimang sunod-sunod nga kadaugan sa maong kuponan sa nasangpit nga dula.
Kini na usab ang ika 17 bulawang medalya sa USA alang sa dulang Basketball sa Olympics, ug ika walo sulod sa siyam ka mga nakalabayng Olympiada.
Kahinumdumang ang susamang mga kuponan ra gihapon ang nag-atbang alang sa gold medal match niadtung 2020 Tokyo Olympics, tulo ka tuig na ang nakalabay, asa pildido gihapon ang France.
Gipangunahan ang kasamtangang kadaugan sa USA nila ni Stephen Curry pinaagi sa 24 puntos, kansa ning pauwan pa og upat ka mga 3-pointer shots sa katapusang duha ka minuto sa dula.
Gidugangan pa kini sa 14 puntos ni LeBron James nga dunay unom ka rebounds ingon man siyam ka mga assists.
Ningpauwan usab og tag-15 puntos sila si Kevin Durant ug Devin Booker alang sa American dream team.
Samtang ang NBA roockie of the year usab nga si Victor Wembanyama, nanguna sa France pinaagi sa 26 puntos, ingon man pito ka mga rebounds kansa kawang ra arun mabira niini ang mga Pranses sa gitinguhang bulawan.
