BUTUAN CITY – Daghan ang nahatagan og katin-awan apan daghan pa gihapon ang angayan pang klaruhon sa pagpadakop sa mga otoridad sa Pilipinas kang kanhi Pangulong Rodrigo Duterte ngadto sa International Criminal Court kon ICC.
Kini ang gipadayag ni Senadora Imee Marcos, chairman sa Senate Committee on Foreign Relations atol sa eksklusibong pakighinabi ning sibyahan.
Atol sa maong hearing, gibutyag mismo sa senadora ang pagkabulabog sa mga representante sa executive branch nga una nang mibarog nga obligado ang Pilipinas pagsunod sa International Police Organization kon InterPol.
Kini human nasuta nga igo lang diay mihangyo ang InterPol, base sa gibasehan nilang papel ug dili kay wanted kini kanila, gawas lang sa International Criminal Court kon ICC kondiin dili na membro ang Pilipinas, rason nga dili angayang itugyan kanila ang kanhi pangulo.
Bisan matud pa ang InterPol mi-angkon nga kini ang unang higayon nga igo lang silang mihangyo nga mangayo og impormasyon kalabot sa akusadong kanhi pangulo apan gidakop gilayon ug gidala sa laing nasud.
Sa pagkakaron, gitun-an una sa senador ang mga pamahayag sa mga resource persons kagahapon nga wala nagkatukma.
Dili pa sigurado ang senadora kung magpatawag pa siya og ikaduhang hearing tungod kay magmugna pa siya og grupo nga langkuban sa mga international law experts, apil na ang mga kanhi justices ug mga police officers nga nakasabot sa mga nahitabo aron matabangan siya pagpasabot ilabina sa mga patakaran sa International Police Organization kon InterPol ug sa International Criminal Court kon ICC sa ingon mapabalik na sa nasud ang kanhi pangulo.
