BUTUAN CITY – Tumang kalipay ug napuno sa pagpasalamat si Joel Padrelana, kinsa nasunugan og balay sa Brgy Holy Redeemer ning siyudad niadtong Pasko ug namatyan pa og anak niadtong unang adaw sa bag-ong tuig, ngadto sa Taligaman Agrarian Beneficiaries Farmers’ Cooperative kon TAGBEFARMCO.
Kini tungod sa pagdonar nila og 35 ka ginabas na nga mga kahoy’ng Tibo aron magamit na alang sa subling pagpabarog sa iyang na-abo nga pinuy-anan.
Sa eksklusibong pakighinabi sa Bombo Radyo Butuan, gipadayag ni Padrelana nga hangtud karon, anaa gihapon sila nagpuyo sa tent sulod sa barangay hall sa Holy Redeemer samtang ang ilang pagkaon, nagsalig usab sila sa nga ayudang ihatud ngadto kanilang mga nasunugan.
Samtang padayon usab ang iyang inadlaw adlaw nga panginabuhian alang sa iyang pamilya.
Hugot usab ang pagpasalamat ni Collin Ilan, bayaw ni Joel Padralana nga apil siya sa natunulan sa ginabas nga mga kahoy’ng Tibo aron mapatukod usab ang iyang balay.
Dili una siya mangibauhi tungod kay unahon niya pagpabarog ang ilang balay aron makapanginabuhi na nga normal. Tabangan matud pa nila sa pagtrabaho sa ilang pinuy-anan aron makabiya na sila sa covered court sa Brgy Holy Redeemer diin sila temporaryong nagpuyo.
