BUTUAN CITY – Atua karon sa Siargao Island sa lungsod sa General Luna, lalawigan sa Surigao del Norte ang napulo ka teams nga gi-assign ni Department of Environment and Natural Resources kon DENR-Caraga Regional Executive Director Felix Allecer.
Kini subay na sa pagmugna sa maong ahensya og Task Force Siargao nga maoy mag-inspect sa mga establishmento, sewage capacity og environmental laws og aron sutaon kung nagsubay ba sila sa balaud.
Ang task force gilangkuban sa mga sakop sa Environmental Management Bureau, DENR-Caraga og Protected Areas Superintendent Unit kon PASU.
Sigon ni Eric Gallego – information officer sa DENR-Caraga sa eksklusibong interview sa Bombo Radyo Butuan, focus nila ang mga establisamientong mi-cater sa mga turista aron masuta kung ila bang gisunod ang mga environmental laws.
Gidugang ni Gallego, dili matud pa gusto sa ilang regional executive director nga masusama sa Boracay Island ang Siargao Islands subay na sa kamanduan ni Sec. Roy Cimatu ilabina nga kada-tuig himuon sa Siargao ang international surfing competitions.
Tinguha matud pa ni Director Allecer nga dili masusama sa Boracay Island ang Siargao nga nahimo nang cesspool tungod kay didto na gipadulong sa dagat ang mga hugaw.
Gidugang ni Gallego, welcome alang kang Governor Sol Matugas ang ilang gihimo sa rasong alang sa pagpreserba kini sa kina-iyahan.
