BUTUAN CITY – Gi-activate na sa local nga kagamhanan ning siyudad sa Butuan ang Task Force on Anti-African Swine Fever kon ASF human nakumpirma ang kaso niini sa Davao Oriental.
Sa eksklusibong pakighinabi sa Bombo Radyo Butuan, gibutyag ni May Diez – tigpamaba sa Butuan City government nga daan nang mihimo og information dissemination ug awareness campaign ang City Veterinary Office aron masigurong mabantayan ang panglawas sa mga tawo sa ingon dili mabutang sa alanganin.
Nanawagan usab ang opisyal sa tanan nga adto lang mupalit og karneng baboy sa mga establisamiento ug mga merkadong duna’y mapakitang certificate gikan sa National Meat Inspection Service kon NMIS.
Aron masigurong ma-contain ang ASF, gimanduan na usab ang mga hotels ug mga kan-anan ning siyudad nga undangon una ang pagpanghatag og pasaw aron dili mapakaon ngadto sa mga binuhiang baboy.
