BUTUAN CITY – Mas gipakusgan na karon sa 4th Infantry ‘Diamond’ Division, Philippine Army ang Task Force HOPE kon Honest, Orderly and Peaceful Election karong nagsingabot na ang local ug national elections nga himuon karong Mayo 9 ning tuiga.
Sa eksklusibong pakighinabi sa Bombo Radyo Butuan, gipadayag ni 4th ID spokesman Major Francisco Garello Jr. nga ang maong task force, niadto pang Oktubre ning mi-aging tuig ug tumong niini ang paglikay sa mga kagubot nga duna’y koneksyon sa eleksyon apil na ang paglikay sa paggamit sa mga pulitiko sa ilang mga private armed groups ingon man ang pagpangilkil sa mga rebeldeng New People’s Army kon NPA ngadto sa mga pulitiko.
Gidugang pa ni Garello, nakig-alayon na sila sa Philippine National Police Units nga ubos usab sa ilang areas of responsibility human sila gi-tap sa Commission on Elections kon COMELEC aron masiguro ang hapsay ug malinawong eleksyon.
Alayon niini, padayon ang ilang combat ug non-combat operations aron malikayan nga mahulga ang mga elections officers, mga boar of canvassers apil na ang mga botante ug mga kandidato sa ingon hingpit nga magmalampuson ang eleksyon.
Subay niini, giklaro ni Major Garello ngadto sa mga kandidato nga kinahanglang sundon gayod ang balaud, ang dili paghatag sa demand sa mga rebeldeng NPA sama sa sukton nilang campaign fee higayong mangampanya sila sa mga lugar nga gi-angkon nilang ilang balwarte.
Giklaro sa opisyal nga usa kini ka klase sa pagpangilkil ug paagi aron makontrola ug makumbinsi sa walhong grupo ang mga botante sa ingon botaran ang mga pulitikong mihatag kanila og kwarta.
