BUTUAN CITY – Nagpatuman karon og skeletal workforce ang lokal nga kagamhanan sa Tandag City, Surigao del Sur human gikumpirma ni Mayor Roxanne Pimentel nga nagpositibo siya sa COVID-19.
Sa gipagawas nga Advisory No. 15 sa Tandag City government, ubos sa skeletal workforce, bugtong mga mahinungdanong transaksyon lang ang ilang atimanon.
Kagahapon, napagawas pa ni Mayor Pimentel ang Executive Order No.53-2020 nga naglugway sugod ning adlawa, Oktubre 8, sa istriktong perimeter control sa natumbok nga containment zone sa siyudad ilabina sa Purok Marigold sa Brgy. Bongtud nga mulungtad hangtud sa Oktubre 14.
Kini aron makapahigayon pa og dugang surveillance, contact tracing ug pagkompleto sa mandatory quarantine/isolation intervention aron matapos gilayon, malikayan ug mapugngan ang impact ug pagkaylap sa impeksyon sa COVID-19.
