BUTUAN CITY – Padayon karung gisuta ang kinatibuk-ang ihap sa mga sakay sa bachelor bus nga nahulog sa pangpang sa mga alas 8:00 kagabii sa utlanan sa may Pulang Lupa, Barangay Dulag ug Brgy. Amparo ning siyudad sa Butuan.
Apan sa nakuhang impormasyon gikan kang Barangay Kapitan Darling Amoy sa Barangay Dulag, dili mominus sa 30 ka mga pasahero ang sakay sa bus nga dunay body number 3709 nga gikan sa San Luis og padulong unta sa siyudad sa Butuan sa dihang kini nadisgrasya.
Sumala sa kapitan nga ubay-ubay ang nahimong samaron sa aksidente lakip na niini ang mga bata. Apan na-grabehan matud pa mao ang drayber sa bus nga si Joven Cariño Vuelban, 40-anyos, olitawo nga residente sa Purok-3, Brgy., Sumilihon, Butuan City tungod sa pagka-ipit niini og maoy katapusang nahaw-as sa gihimong rescue operation.
Sa inisyal nga impormasyuon gikan sa kapulisan, nawad-an sa kontrol sa manubela ang drayber sa bus tungod sa kadanlog sa dapan og wala nigana usab ang brake rason sa pagkahulog niini sa pangpang.
Gidala ang tanang pasahero sa Butuan Medical Center human nakahiagum og minor injuries samtang ang drayber gidala sa Butuan Doctors Hospital.
