BUTUAN CITY – Gipatuman sa tanang korte sa Pilipinas ang upat ka adlaw nga on-site work ug usa ka adlaw nga work-from-home (WFH) sugod karong adlawa Lunes base sa direktiba ni Pangulong Ferdinand Marcos Jr. sa mga ahensya sa gobyerno nga i-adopt ang 4-day workweek aron maminusan ang konsumo sa lana tungod sa epekto sa nagpadayon nga gubat sa Middle East.
Gipasabot sa Korte Suprema nga kinahanglan gihapong mosulod matag-Biyernes ang mga 25% sa mga empleyado sa matag opisina o dibisyon, base sa desisyon sa head of office, aron masiguro nga magpadayon ang operasyon.
Gipunting usab sa high court nga dili dapat mahimong rason ang bag-ong work arrangement sa pagkansela o pagsalindot sa bisan unsang naka-iskedyul nga pagdungog (hearing), ug kinahanglan kining ipadayon sumala sa gitakda sa korte.
Gimandoan usab ang mga korte nga mosunod sa energy conservation practices, sama sa pag-set sa air-conditioning sa 24 degrees Celsius, pagpalong sa office equipment kung dili gamiton, pagminus sa paggamit sa elevator, ug paghimo sa mga meeting online.
Dili apil sa bag-ong work arrangement ang Sandiganbayan ug ang Court of Tax Appeals.
