BUTUAN CITY – Kumpirmadong nanukot na ang lokal nga kagamhanan sa General Luna sa Siargao Island, Surigao del Norte og bayad alang niadtong mga turistang musulod sa ilado na sa tibuok kalibutan nga isla.
Sigon ni kanhi US lifeguard Roel Catoto, apil sa ginasukot na karon ang conservation and admission fee nga 50-pesos og uban pa sama sa tag-20 pesos nga bayran niadtong mag-surfing, maligo sa dagat og mag-site seeing lang.
Nasayrang ang pagpanukot gisaway sa mga residente sa maong lugar tungod kay gipatuman lang kini karong temporaryong gisira ang Boracay Island.
Gipasabot ni Catoto nga dili kini angayang sawayon sa mga lokal nga residente og mas maayo nga suportahan hinuon tungod kay kinahanglanon man kini sa lokal nga kagamhanan alang sa pagmintina sa palibot ilabina ang paghatag og kaseguruhan sa pagpanarbaho sa mga residenteng gitahasan pagmintina sa kanindot og kahinlo sa palibot.
Makatabang usab kini sa pagmontar og emergency response sama sa pagbutang og ambulansya og medical team alang niadtong posibleng madisgrasya ilabina sa surfing. (Beth Ruiz)
