BUTUAN CITY – Magpatuman og mandatory rapid testing ang probinsyal nga panggamhanan sa Agusan del Sur ngadto sa tanang indibidwal nga gikan sa Butuan City ug mosulod sa ilang probinsya kansa magsugod ugmang adlawa Hunyo 23.
Kini human gikumpirma sa Department of Health kon DOH-Caraga ang local transmission sa COVID-19 dinhi sa syudad sa Butuan kansa nakahatag og kabalaka sa katawhan.
Sigon ni Agusan del Sur Gov. Santiago Santi Cane, wala kini exemptions tungod kay bisan ang mga opisyal o empleyado sa probinsya, lakip na ang mga empleyado sa nasudnong buhatan nga nakabase sa Agusan del Sur ug nagpuyo sa Butuan, kinahanglang mopailalom gayod sa maong test.
Gihangyo usab ni Gov. Cane nga kung mahimo, sa probinsya una sila temporaryong magpoyo aron dili na magsige og uli sa Butuan samtang epektibo pa ang maong polisiya.
Nangayo og pagsabot ang opisyal ngadto sa katawhan sa gipatumang lakang sanglit aron magpabiling wala’y matalang local transmission sa ilang probinsya dungan sa pagpadayag nga dili gara-gara ang kasamtangang sitwasyon nga kinahanglang seryusohon ug tumanon ang mga tamdanang gipatuman.
