BUTUAN CITY – Padayon pang gitambalan sa Amai Pakpak Medical Center sa Marawi City ang 20-anyos nga estudyanteng Caraganon human gipusil diha sa commercial center sa Mindanao State University kon MSU- main campus sa Marawi City pasado alas-6:55 kagabii.
Ang samad-pinusilan sa iyang agtang ang hinungdan nga anaa karon sa delikadong kahimtang ang biktimang si Ivan Almeda, residente sa Bayugan City lalawigan sa Agusan del Sur og first year student sa kursong Bachelor of Physical Education.
Nasayrang kini na ang ikatulong estudyanteang taga-Caraga Region nga gipusil sulod mismo sa MSU main campus kondiin ang unang duha nga taga-Surigao del Norte, parehong namatay ug hangtud karon, wala pa mahatagi og hustisya ang ilang kabanay kalabot sa ilang nadangatan.
Migawas sa inisyal nga imbestigasyon nga gipusil ang biktima sa wala pa mailang responsable diha sa iyang agtang og gisuta pa sa mga otoridad ang motibo sa nasangpit nga krimen.
Padayon pa ang imbestigasyon sa kapulisan aron maila og mapanubag ang mga responsable sa ilang gihimo.
