BUTUAN CITY – Padayong nanguha ug dugang impormasyon ang kapulisan aron mailhan ang mipusil-patay sa tag-iya sa usa ka punerarya alas 7:50 kagabii sa may P-5, Barangay San Vicente, lungsod sa Sibagat, Agusan Del Sur.
Giila ni Insp. Geronimo Curminal, Deputy chief sa Sibagat Municipal Police Station ang biktima nga si Yolanda Chato, bulag sa bana nga residente sa maong dapit.
Base sa ilang imbestigasyon, duha ka suspetsado ang mga responsable diin ang usa maoy nakigtransaksiyun sa biktima samtang ang kauban niini ang mipusil gamit ang .45 nga kalibre sa pistola.
Patay-on-the-spot ang biktima sa dihang nakahiagum ug usa ka samad pinusilan sa tangkugo.
Gibutyag pa ni Insp. Curminal nga wala naka-bonnet ang mga suspetsado rasong nakit-an ang panagway niini sa mga empleyado sa maong punerarya nga nakasaksi sa panghitabo.
Human sa maong kremin, daling misibat ang mga suspetsado sakay sa usa ka single motor, ngadto sa wala matinong direksiyun.
