BUTUAN CITY – Napa-blotter na sa Traffic Management Division sa City Transportation and Traffic Management Department ning dakbayan sa Butuan ang nahitabong diryot pag ligis sa usa ka delivery truck ngadto sa ilahang traffic enforcer kagahapong adlawa, bandang alas 2 ang takna sa hapon.
Sumala ni Jane Baker, ang Traffic Management Division Head sa City Transportation and Traffic Management Department nga recorded matud pa ang tanang panghitabo tungod kay duna may gisuot nga body camera ang traffic enforcer samtang gihimo niini ang tahas.
Saysay sa opisyal nga sa ilang inisyal nga imbistigasyon, mamahimo matud pang kasohan og Attempted Homicide ang driver sa maong sakyanan tungod kay duna man kini intensyon nga ligsan ang enforcer, subay na usab sa mga nanggawas nga video.
Sa kasamtangan, gilihok na usab sa buhatan ang mga papeles alang sa pag-revoke sa lisensya sa driver ingon man sa gigamit niining sakyanan.
Naila ang maong suspek nga si Cyrus P. Martinez, lumad nga taga Datu Maguindanao.
Sigon ni Baker, nahitabo ang insidente dihang pa-subangan matud pa ang dagan sa trapiko sa may intersection sa JC Aquino highway ning dakbayan sa Butuan, apan kalit nalang nga ni U-turn ang maong driver, hinungdan nga diryot pa kining nakabangga og laing sakyanan. Dire na gi-apprehend sa mga traffic enforcer ang maong sakyanan, apan nagdumili kini sa paghatag sa iyahang lisensya, hinoon, nisuway pa kini pagsibat. Lakip sa gi-isyu sa maong driver ang “No U-Turn” ug “Reckless driving”.
Nihunong lamang matud pa ang maong suspetsado sa pagpadagan sa iyahang sakyanan nga gikapyutan sa Traffic Enforcer dihang ilang nakasugat ang Patrol car sa Station 1.
Sayrang duna untanay i-deliver ang maong sakyanan sa usa ka fast food chain nga anaa ra tungod sa traffic light nga gi-likuan niini.
Ang pamahayag ni Jane Baker, ang Traffic Management Division Head sa City Transportation and Traffic Management Department sa pakig hinabi ning sibyahan.
