BUTUAN CITY – Imbes malipayong sugaton ang bana nga mipa-uli gikan sa abroad, doble kaguol na hinuon ang misugat sa overseas Filipino worker human nadisgrasya ang gisakyang sports utility vehicle kon SUV sa iyang asawa ug duha ka mga anak kaganinang alas-siete sa buntag sa national highway sa Purok 1, Brgy Sumilihon ning siyudad sa Butuan.
Base sa inisyal nga imbestigasyon, mibangga ang maong sakyanan sa usa ka wing van nga gikan sa Cagayan de Oro City ug duna’y kargang glue aron unta ihatud sa usa ka plywood company sa Magallanes, Agusan del Norte.
Nagrabehan sa maong insidente ang tag-iya sa SUV nga si Gerrelyn Calaque (name subject for verification) ug ang 7-anyos niining anak nga babaye nga iyang gisabak samtang naglingkod sa front seat samtang shock usab ang 10-anyos niining anak nga lalaking anaa sa passenger seat.
Nasayrang gikan pa ang sakyanang gimanehuan ni Vincent Mahumok, 26-anyos, sa ilang lugar sa Brgy Hayanggabon, lungsod sa Claver, Surigao del Norte kondiin mibiya sila pasado alas-kwatro sa kaadlawon ug padulong unta sa Bancasi Airport apan wala na maka-abot tungod sa disgrasya.
Sa eksklusibong pakighinabi sa Bombo Radyo Butuan, gipadayag sa driver sa wing van nga si Arturo Sembrado, taga-Cagayan de Oro City, nga layo-layo pa lang, nabantayan na niya ang grabe kakusog nga dagan sa SUV nga padulong sa iyang direksyon rason nga mihunong na siya.
Iya na unta matud pang ilikay ang sakyanan apan ulahi na tungod sa kakusog sa dagan sa SUV nga daling mibangga niini.
