BUTUAN CITY – Kampante ang abogado ni kanhi Bamban Mayor Alice Guo nga si Atty. Stephen David nga ania lang sa Pilipinas ang iyang kliyente base na usab sa ilang panag-istorya online.
Sa ilang panag-istorya, nanumpa si Guo nga ania lang siya sa Pilipinas dungan sa pagbutyag nga kung bakak ang gipadayag ni Guo, usa kini ka dakong isyu sa notary nga nag-certify sa affidavit sa kanhi mayor nga gisubmite ngadto sa Department of Justice.
Sigon ni David, kinsa wala masayod sa identity sa notary apan nasayod nga didto kini sa San Jose del Monte, Bulacan, ang maong notary mahimong mag-atubang og multa kung dili mupatim-aw nga personal si Guo.
Misalig usab siya sa mga immigration authorities nga maubay nila ang nahimutngan ni Guo ug subli kining kontakon aron hisgutan ang claims ni Senadora Risa Hontiveros.
Dugang pa ni David, nakahisgot kaniya si Guo nga mudagan sa 2025 election ug iyang batukan ang iyang disqualification aron makaduso siya sa iyang kandidatura.
