BUTUAN CITY- Patay ang gitudlong suspek sa pagpangawat, pag sulay og lugos sa 16-anyos nga babaye, ingon man sa pag sunog sa balay, human kini gilayug sa mga katawhan bandang alas-8 ang takna sa buntag kaganina.
Naila ang suspek nga si Catalino Gemintoan, samtang wala pa usab masayri kung taga-diin kini. Sumala sa Municipal Disaster Risk Reduction and Management Office kon PDRRMO Trento, kansa maoy ning responde sa nasangpit nga panghitabo, nga naka angkon matud pa og major head injuries ang maong lalaki, rason sa hinanali niining kamatayon.
Kahinumduman nga Luwas nga nakagawas ang usa ka 16-anyos nga dalagitang diriyot pang malugos sa usa ka kawatan human gidabdaban ang ilang pinuy-anan sa Purok 7-C, Paradise, Brgy. Poblacion, lungsod sa Trento, Agusan del Sur niadtung Marso 28, pasado ala-1:30 sa kaadlawon.
Nasayrang nag-inusara lang sa ilang pinuy-anan niadtong tungura ang biktimang gitago lang sa pangalang Inday, gumikan kay atua sa kasikbit nga lungsod sa Sta. Josefa ang iyang mga ginikanan.
Gisulayan matud pa siya paglugos dihang gigapos, gidunggab sa dughan ug gibunalan pa og botelya ang iyang ulo rason nga nagpa-patay-patay siya ug dinhi na nagdesisyon ang kawatan nga biyaan kini dayong sunog sa ilang balay.
Nakagawas ang biktima agi sa bintana samtang nagkamang nga wala na’y underwear rason nga nakalingkawas siya gikan sa tino untang kamatayon samtang nabitbit sa kawatan ang iyang iphone ug 400-pisos nga cash.
Nasuta pa nga duha ka mga balay ang unang gisulod sa kawatan pasado alas-12 pa lang sa tungang gabii kondiin nakuha niini ang cell phone ug wala pa matino nga kantidad sa kwarta.
Samtang sa ikaduhang balay, wala kini mulampos tungod kay diha man sa sala nangatulog ang mga tagbalay.
Sa kasamtangan, anaa na sa usa ka punerarya sa Hospital sa Bunawan ang maong lalaki ug gihulat nalang ang pamilya nga mu kuha niini. (REPORTS FROM: Bombo Lilibeth Ruiz)
