BUTUAN CITY – Gi-andam na ang kasong ipasaka batuk sa suspek sa pagpangluba-patay tungod lang sa away trapiko kagahapon sa kaadlawon sa may National Highway sa Purok-2B , Barangay 1, lungsod sa San Francisco, Agusan del Sur.
Naila ang suspetsadong si Reypol Estorba Ordoña, 26-anyos, olitawo, self-employed ug residente sa P3, Brgy. Patin-ay Prosperidad, sa susamang probinsiya.
N asayrang naglalis diha sa kalsada ang suspek ug ang ang biktimang si Vincent Jacob Beldad Aguilar, 21-anyos, dunay kapuyo, self-employed, ug nanimuyo sa P1, Brgy. 4, San Francisco, Agusan del Sur nga miresulta sa ilang pagsinumbagay.
Apan kalit lang matud pang mibonot sa dala niyang kutsilyo ang suspek og giluba ang biktima diha sa dughan kinsa gidala gilayon sa Democrito O. Plaza Memorial Hospital apan gideklara kining dead on arrival sa attending physician.
Ang maong panghitabo nakuhaan sa CCTV hinungdan nga na-ilhan ang suspek ug gilayong na-aresto.
Nakuha usab ang gigamit nga kutsilyo diha sa iyang posisyon nga karun gikustudiya na usab sa San Francisco Municipal Police Station alang sa tukmang disposasyon. (Rolan Janea)
