BUTUAN CITY – Gikatakdang i-turn over sa kapulisan sa lungsod sa San Miguel, Surigao del Sur ngadto sa issuing court ang usa sa mga suspek nga gidudahang apil sa mipusil-patay kang Mayor Dario Otaza sa lungsod sa Loreto, Agusan del Sur.
Sigon ni P/Chief Insp. George Cariño- hepe sa San Miguel Municipal Police Station, mosulay pa pagsibat ang suspek nga si Maximo Catarata, alyas Boy Tindugan, 48-anyos, residente sa Brgy. Binucayan lungsod sa Loreto.
Ilang natud-an ang lokasyon sa suspek sa Purok 1, Brgy. Bolhoon sa lungsod sa San Miguel human nakadawat og tip nga anaa kini sulod sa sabungan,.
Nasayrang kanhi lider matud pa sa rebeldeng New People’s Army si Catarata kinsa mitahan sa militar apan nag-atubang og mga kasong frustrated murder, murder og rebelyon.
Mahinumdumang gipatay sa mga gidudahang rebeldeng NPA si Mayor Otaza og anak niining si Daryl niadtong Oktubre 22, 2015 human gidagit sa ilang pinuy-anan dinhi sa dakbayan sa Butuan. (Beth Ruiz)
