BUTUAN CITY – Kinahanglan nga wala’y increase sa presyo sa mga ginapalit nga tubig sa mga water refilling stations sa dakbayan sa Butuan.
Kini ang giklaro ni Butuan City Councilor Cromwell Nortega human nabani-og nga mi-abot na sa 30 ngadto sa 40-pisos ang presyo sa kada-galloon sa mga mineral water sukad gipa-ilalom sa state of calamity ang dakbayan.
Gibutyag ni Nortega nga aktibong nag-monitor ang Business Permits and Licensing Department kon BPLD ug ang Local Price Monitiring Council sa dakbayan aron masuta ang kamatu-uran niini nga yanguno sa mga tawo nga gipaagi lang sa mga Facebook post.
Pag-angkon usab sa maong opisyal, walay bisan usa nga opisyal nga reklamong gipadangat ngadto sa ilang buhatan mahitungod sa overpriced nga mga tubig.
Tungod niini, ilang gihangyo ang mga personahe sa BPLD nga surprise inspection ang himuon aron masakpan gayod ang mga refilling stations ning siyudad nga nagpahimulos sa nasinatian karong krisis sa tubig.
