BUTUAN CITY – Padayong gidagsa sa mga Surigaonons ug Dinagatnons ang dakbayan sa Butuan pila ka adlaw human gikuso-kuso sa bagyong Odette niadtong Huwebes.
Ang pag-exodus sa mga biktima sa bagyo, maoy nagpapuno karon sa mga lodging houses ug mga hotels nga maoy temporaryo nilang gipuy-an aron lang makabaton sila og cell phone signal ug maka-charge sa ilang cell phone tungod sa kawala pa gihapon nila’y linya sa kuryente ug komunikasyon.
Sama na lang kang Patrilyn Limpioso-Iway nga taga-Purok 4, Donville, lungsod sa Dinagat sa Dinagat islands province kinsa mituyo lang pag-anhi sa Butuan uban sa pipila nila ka mga silingan aron lang makapa-abot og mensahe sa ilang mga mahal sa kinabuhi kalabot sa ila karong sitwasyon.
Sa eksklusibong pakighinabi ni Bombo Dinagat correspondent Ruel Hipulan, gipadayag niining mamalit usab siya og mga gamit sa ilang balay kung duna pa’y sulod ang iyang bank account human nga gibanlas ni Odette ang tanan nilang mga gamit.
Tungod sa nag-ila-id nilang sitwasyon, mi-apela siya nga unta tabangan silang tanan nga taga-Dinagat Islands. Partikular nga iyang gi-apela nga unta tabangan silang subling mapabarog ang ilang paninalay aron duna’y kasilungan panahon sa ting-ulan ug ting-init.
Kini ilabina nga halos tanan sa iyang mga ka-tagilungsod, wala na’y balay nga kapuy-an tungod kay gilaras kini pagguba ni Odette.
