BUTUAN CITY – Nagduso na og petisyon ngadto sa Commission on Elections kon COMELEC-Central Office ang mayoralty candidate sa lungsod sa Tago, Surigao del Sur batuk kang 1st district re-electionist Congressman Prospero Pichay.
Uban sa gireklamo ang laing 14 ka mga indibidwal kinsa kandidato pagka-kongresista, gobernador og besi-gobernador ingon man pagka-mayor, besi-mayor og pagka-konsehal sa Tandag City.
Kini tungod sa pagpamalit matud pa nila og mga boto.
Base sa petisyon sa 57-anyos nga si Rogelio Pimentel, residente sa Curada St. sa maong lungsod, apil sa iyang gipetisyunan sila Tandag City re-electionist Mayor Alexander ‘Ayec’ Pimentel; Glenn Pichay-Plaza; Roxanne Pimentel; John Paul Pimentel; Albert Perez; Hyna Buniao’ Rebecca Avila; Rey Geli; Imelda Falcon; Dennis Tan; Peng Azarcon; Seldio Pilonggo og Dodong Urbiztondo.
Base sa petisyon, tinguha sa reklamante nga madeklara ang tanang mga respondents nga guilty sa illegal vote-buying rason nga angayan lang matud pang ma-disqualify sa pagkupot og gahom og i-revoke ang ilang certificates of candidacy.
Gihangyo usab niini ang provincial board of canvasser sa maong lalawigan apil na sa City Board of Canvasser sa Tandag City nga ikonsidera ang botong mupadulong kanila nga astray votes rason nga dili angayang iphon pabor kanila.
Tinguha usab niyang i-disqualify sa Civil Service Commission, ingon man sa Department of Interior and Local Government og uban pang hingtungdang ahensya sa gobyerno, ang maong mga respondents pagkupot og public office.
