BUTUAN CITY – Paningkamutan sa kadumalahan sa Surigao del Norte Electric Cooperative kon SURNECO nga mabalik na karong Huwebes, Enero 12, ang supply sa sugang dagitabnon sa tibuok coverage area niini human naputlan og linya sa kuryente niadto pang Dominggo.
Sigon ni SURNECO General Manager Narciso Caliao Jr., ang pagkawala sa supply sa ilang kuryente mugna sa pagkatumba sa 138 KV transmission tower sa National Grid Corporation of the Philippines kon NGCP sa lungsod sa Alegria human gibanlas sa tubig -baha nga dala ni bagyong Auring.
Gawas niini, natumba usab ang Emergency Restoration System kon ERS tower sa may Brgy. Balang-Balang, lungsod sa RTR, lalawigan sa Agusan del Norte.
Samtang gikumpirma ni Glory Rebleza sa NGCP-Mindanao nga apil sa wala’y kuryente ang pipila ka lungsod sa Surigao del Sur og ang Surigao City. (Beth Ruiz)
