BUTUAN CITY – Tulo ka hinay nga mga tectonic nga linog ang mitay-og sa lalawigan sa Surigao del Sur kagahapon, base na sa pagkumpirma sa Philippine Institute of Volcanology and Seismology kon PhiVolcs.
Apan ang maong linog wala makamugna og bisan unsa mang damyos o kaha injury. Sa ilang bulletin, gibutyag sa Phivolcs nga usa ka 3.7 magnitude nga linog ang natala papsado alas-6:33 kagabii sa gilay-ong 27 kilometros sa habagatang sidlakan sa lungsod sa Cagwait nga duna’y giladmong 24 kilometros.
Una niini, usa ka 2.6 magnitude nga linog ang natala pasado alas-4:36 kagahapon sa hapon kansang epicenter nasubay sa 72 kilometros sa amihanang sidlakan duol sa lungsod sa Hinatuan na duna’y giladmong18 kilometros.
Samtang alas-4:25 kagahapon sa kaadlawon unang natala ang 2.4 magnitude nga linog kansang epicenter napalgan sa gilay-ong 61 kilometros sa amihanang sidlakan sa lungsod sa Cortes nga duna’y giladmong 32 kilometros . (Beth Ruiz)
