BUTUAN CITY – Hingpit nga gikalipay nga gibati ni House Deputy Speaker ug Surigao del Sur 1st District Rep. Prospero “Butch” Pichay, Jr ang desisyon sa Sandiganbayan nga nag-abswelto kaniya sa kasong pagpangawkaw ug paglapas sa Code of Conduct and Ethical Standard.
Sa 24 ka palid nga desisyon, gibakwi sa anti-graft court ang unang desisyon sa Sandiganbayan 5th Division adtong October 23, 2020, diin gihukman si Pichay uban sa laing duha pa ka indibidwal tungod sa paglapas sa RA 3019 ug RA 6713.
Nagsumikad ang kaso dihang nag-sponsor si Pichay kinsa kaniadto chairman sa Local Water Utilities Administration kon LWUA sa kantidad nga 1.5-milyunes pesos sa usa ka chess tournament.
Sa pakighinabi sa Bombo Radyo Butuan, gipadayag ni Pichay nga wala’y sayop sa iyang gibuhat tungod kay nag-suporta lamang siya sa isports ug walay nahitabong paglapas sa balaod butang nga nakita sa Sandiganbayan rason nga proud siya sa iyang pagsuporta sa mga sporting events labi na niadtong presidente pa kini sa National Chess Federation sanglit naka-produce siya og mga World Champions.
Madumdumang gikwestyon ni Pichay ang hukom kaniya kaniadto pinaagi sa pagpa-file og Motion for Reconsideration niadtong Nov. 6, 2020 ug human gi-review sa Sandigangbayan ang kaso, napamatud-ang nasayop ang pagpahamtang og hukom tungod kay kulang ang ebidensiyang giprenisinta sa mga nagduso sa kaso.
Tungod niini gimando sa Sandigangbayan nga ipawala’y bili ang October 23, 2020 ruling sa 2 ka kaso dayong abswelto kang Pichay, Jr. ug sa mga co-accused nga sila Emmanuel Malicdem ug Wilfredo Feleo ug wagtangon na ang Hold Departure Order o HDO batok kaniya dayong pagpa-uli sa iyang gihatag nga pyansa.
Gisulat ang acquittal order ni Associate Justice Maryann Corpus-Mañalac, ug gi-uyunan usab nila Associate Justice Rafael Lagos kinsa chairman sa 5th division ug Associate Justice Maria Theresa Mendoza-Arcega.
