BUTUAN CITY – Gikumpirma ni Lt. Lemuel Lalata, ang Civil Military Operations kon CMO officer sa 30th Infantry Battalion, Philippine Army nga New People’s Army kon NPA-free na ang tibuok lalawigan sa Surigao del Norte.
Sa eksklusibong pakighinabi sa Bombo Radyo Butuan, gibutyag sa opisyal nga pila ka buwan nang NPA-free ang dakong parte sa lalawigan kansa nahimo nang kinatibuk-an human ang pagtahan sa upat ka mga rebeldeng sakop sa Sandatahang Yunit Pangpropaganda kon SYP-16 B nga maoy katapusang naglihok sa kabukiran sa nasangpit nga lalawigan.
Samtang giklaro sa opisyal nga wala pa nila nadeklarang insurgency-free ang lungsod sa Sison, tungod kay inisyatiba lang kini sa lokal nga kagamhanan human misurender ang upat ka mga rebelde pagpanguna ni Ka Lucas.
Hinuon ila nang gihikay ang mga dokumento alang sa pagdeklara unya sa maong lungsod nga insurgency-free.
