BUTUAN CITY Gideklara na nga insurgency-free ang lalawigan sa Surigao del Norte human gi-aprubahan sa Provincial Peace and Order Council ug sa Provincial Development Council sa maong lalawigan ang joint resolution sa sayong bahin ning bulana.
Mismong si Department of National Defense Secretary Gilberto Teodoro Jr., ang mihimo sa formal announcement kagahapon nga gisaksihan nila Department of the Interior and Local Government Secretary Benjamin Abalos Jr., National Task Force to End Local Communist Armed Conflict Executive Director Ernesto Torres Jr., Armed Forces of the Philippines Chief of Staff Gen. Romeo Brawner Jr. ug Surigao del Norte Governor Roberto Lyndon Barbers.
Sigon ni Sec. Teodoro, sama sa ubang mga lugar sa Mindanao, ang katawhan sa Surigao del Norte, dili na gustong duna’y mga kalihukang insurhensiya sa maong lalawigan ug ang pinaka-importante matud pa nga nahitabo, mao ang deklarasyon sa katawhan.
Misaad ang kalihim nga magpatuman og mga programang makatabang sa probinsya ug sa mga kanhi rebelde nga mibalik na sa sabakan sa balaud aron dili na mubalik pa sa walhong kalihukan.
Samtang gipadayag usab ni Surigao del Norte Governor Roberto Lyndon Barbers nga nagpabiling hagit kanila karon ang pagmintina ug paglahutay sa internal peace and security, uban sa suporta sa nasudnong kagamhanan.
