BUTUAN CITY – Gitay-og sa duha ka hinay nga linog ang Siargao Island kaganina og kagahapon.
Sa bulletin sa Philippine Institute of Volcanology and Seismology kon Phivolcs, natala ang 2.8 magnitude nga linog kaganinang alas-12:33 sa kaadlawon kansang epicenter nasubay sa gilay-ong usa ka kilometro sa amihanang sidlakan sa Pacific Ocean atbang sa lungsod sa Burgos, sa Siargao Island, Surigao del Norte na duna’y giladmong 15 kilometros.
Una niini, gitay-og pa sa 2.8 magnitude nga linog ang kagahapon ang habagatang sidlakan sa General Luna sa gilay-ong 33 kilometros sa susamang Pacific Ocean nga duna’y giladmong 18 kilometros.
Parehong tectonic ang gigikanan sa linog samtang gitaho sa Surigao del Norte provincial disaster risk reduction and management council nga wala’ya natalang damyos o kaha casualty sa maong pagtay-og. (Beth Ruiz)
