BUTUAN CITY – Wala’y basehan ang resolusyong gipapasar sa Surigao City Council kagahapon nga naghangyo sa Department of Health kon DOH-Caraga nga dili na mag-refer og COVID-19 patient o kaha ‘Patient Under Investigation’ kon PUI ngadto sa Caraga Regional Hospital.
Sa eksklusibong pakighinabi sa Bombo Radyo Butuan, giklaro ni Butuan City ug Agusan del Norte 1st District Representative Lawrence Lemuel Fortun nga dili angayang kalimtan sa mga opisyal sa Surigao City ang nature sa maong ospital kansa usa ka DOH-regional hospital nga gipunduhan sa nasudnong kagamhanan pinaagi sa Department of Health rason nga ang pundong gigamit sa operasyon niini apil ang suhulan sa mga empleyado, gipunduhan sa nasudnong kagamhanan ug dili sa lokal nga kagamhanan sa maong siyudad.
Tungod niini, tataw ug klaro nga dili kini ubos sa kontrol og superbisyon sa Surigao City government hinungdan nga wala kini binding effect sa maong ospital.
Kampante si Congressman Fortun nga ipawala’y bili kini sa DOH-Region 13 sa rasong dili kini resolusyong nagmando sa DOH nga dili na butangan og mga PUIs ang Caraga Regional Hospital kondili naghangyo lang.
Dugang pa sa kongresista, bisan og dili pa ireklamo ang maong resolusyon ngadto sa mga hingtungdang ahensya sa gobyerno, wala’y angayang kabalak-an ang katawhan tungod kay wala kini ngipon nga angayang sundon.
