BUTUAN CITY – Sa tinguha nga makunhuran na ang nagkataas nga kaso sa COVID-19, gipa-ilalom sa Modified Enhanced Community Quarantine kon MECQ ni Surigao del Norte Governor Lalo Matugas ang Surigao City ug ang tulo ka mga lungsod sa lalawigan nga gilangkuban sa Claver, General Luna, Sison, Gigaquit, Alegria ug Malimono.
Sigon ni provincial administrator Sim Castrence, gipalig-on kini nga deklarasyon pinaagi sa Executive Order No. 21-023 series of 2021 nga pirmado sa gobernador.
Ang kamanduan sa gobernador gisunod pinaagi sa guidelines sa Inter-Agency Task Force higayong mu-abot na sa napulo ka mga COVID-19 cases sa usa ka local government unit.
Sa eksklusibong pakighinabi sa Bombo Radyo Philippines, gipadayag ni Castrence nga pinaagi niini, mapugngan na ang paglihok-lihok sa mga tawo nga ning nakalabay’ng mga adlaw, sobra ra kakumpyansa ug daw wala na misunod sa mga health protocols rason sa padayong pagdaghan sa mga kaso.
Gidugang pa sa opisyal nga mireklamo na ang mga pribado ug pampublikong ospital tungod kay naka-abot na sila sa ilang full capacity rason nga maglisod na sila pag-atiman sa tanan nilang mga pasyente.
Tungod usab matud pa kay saturated na ang contact-tracing sa daghang mga kaso, ang kasamtangang ihap wala na musalamin sa tinuod nga sitwasyon tungod sa ilang limitadong kapasidad. Gani ang mga pribadong ospital sa Surigao City, wala na nangdawat pa og mga pasyente tungod sa kadaghanna sa ilang atimanunon.
