BUTUAN CITY – Balik sa klase na karung hapon ang Surigao City National Highschool lakip na ang kasikbit nga elementary School human usab gikansela ang klase kaganihang buntag tungod sa nadawat nga bomb threat.
Saysay pa sa principal nga si Arthur Jamira, nga kagabii pa sa dihang duna matud pay ilang estudyante nga nagpahibalo pinaagi sa group chat nga dunay mahitabong pagpamomba diin nasayud siya pagka-kaadlawon na.
Tungod sa panawagan sa mga magtutudlo og uban pang mga lideres sa tunghaan, gipaabot usab niya kini sa kapulisan og gihimo ang pag-clearing sa lugar kauban ang K-9 units sa tabang usab sa Parents Teachers Association. Pasado alas 9:00 na sa buntag na-clear og walay nakitang bomba sa tibook campus.
Sa karun padayon ang gihimong imbestigasyon dili lang sa kapulisan kundi apil na sa mga magtutudlo aron masuta kung si kinsa ang sinugdanan sa maong impormasyon nga miresulta og grabeng pagpanic kanila.
