BUTUAN CITY – Ipa-ilalom sa Adjusted General Community Quaratine kon A-GCQ sugod Novembre 16 hangtud 30, ang entiro siyudad sa Surigao. Base kini sa gipagawas nga Executive Order No. 66 series of 2020 ni Mayor Ernesto Matugas Jr. kahapon.
Tumong sa maong kamanduan nga malikayan ang posibilidad nga mubalik ang pagdaghan sa mga matakdan sa CoViD-19.
Ubos sa A-GCQ, magpabiling dili tugutan ang katawhan paggawas-gawas sa ilang panimalay gawas kung duna’y quarantine pass nga isyu sa barangay, labi na ang mga nag-edad og 14 anyos paubos ug mga senior citizens nga sobra na 65-anyos.
Magpabilin usab ang liquor ban, ang pagdili sa mga mass gatherings gawas sa mga relihiyosong kalihukan sama sa misa apan limitado lang sa 50% ang kapasidad sulod sa simbahan, adjusted usab ang curfew hour nga karon gikan sa alas-nueve sa gabii hangtud alas-kwatro sa kaadlawon ngadto na sa alas-onse sa gabii ngadto na sa alas-kwatro sa kaadlawon.
Sa public transport usab, magpabiling tulo lang gihapon ang pasakyong pasahero sa tricycle, siyam sa multicab kondiin padayon usab ang pagpatuman sa number coding scheme sa mga tricycle.
Istrikto na usab ang pagpagamit sa QR coded e-Health Pass.
