BUTUAN CITY – Gipaneguro ni kanhi Senate President Aquilino “Koko’ Pimentel III nga magpabilin ang iyang hugot nga suporta ngadto sa bag-ong liderato sa Senado ilawom sa bag-ong Senate President nga si Sen. Vicente “Tito” Sotto III.
Sa pakighinabi ning sibyahan, gibutyag niini nga anaa na sa saktong panahon alang kay si Sen. Vicente “Tito” Sotto III nga maoy mulingkod isip senate president aron magamit ang iyang kasinatian diha sa Senado.
Sigon niini, nga dili matud pa lalim ang paghimo ug balaod tungod kay daw nahisama kini sa usa ka marathon.
Matud pa nga ang ilang gihimo karon nagtumong aron nga makasugakod sila sa lain na usab nga tuig sa pagbuhat sa ilang mga responsibilidad diha sa Senado hilabi na karon nga daghan usab sila ug mga gihisgutan sa senado nga mga importanteng balaodnon.
Gidugang pa sa nasangpit nga senador nga ang nahitabong kabag-uhan karon sa liderato sa Senado gihimo pinaagi sa usa ka malinawon ug boluntaryo nga pagbalhin sa liderato ug ila kining nasabutan pag-ayo.
Gitin-aw usab niini nga wala mabungkag ang super majority sa Senado kungdiin nagpabilin gihapon ang gidaghanon niini nga 17 ka mga senador diha sa super majority.
Sa karon, kasamtangan pa silang nag-reorganize sa mga ginagmay’ng papel nga pagahuptan diha sa Senado alang sa pagpadayon sa ilang trabaho. Subay niini, gitudlo matud pa si Sen. Migz Zubiri nga maoy mamahimong majority leader samtang iyang pagahuptan usab ang mga komitiba nga gihuptan ni Sen. Migz Zubiri kaniadto lakip na ang komitiba nga adunay kalambigitan sa election.
Nasayran nga lakip si Sen. Pimentel sa mga re-electionist senators nga nakatakdang mag-file sa ilang certificate of candidacy sa buwan sa Oktubre ning tuiga. (Mon Aplaya)
