BUTUAN CITY – Padayon pa ang imbestigasyon sa kapulisan sa Remedios T. Romualdez kon RTR, Agusan del Norte sa natigayong pagpamusil ning mi-aging Dominggo sa alas-kwatro sa hapon nga mikalas usa ka negosyanteng babaye.
Naila ang biktimang si Belen Estorya Dugas, 41-anyos, minyo ug residente sa Purok 6, Brgy. Tagbungabong, sakop sa maong lungsod.
Migawas sa inisyal nga imbestigasyon pagpanguna ni PCaptin Joel Ablan, officer-in-charge sa RTR Municipal Police Station, base sa asuy sa bana sa biktima nga si Teofilo Dugas, samtang nagkamulo og trabaho sa ilang piggery farm ang iyang asawa, giduol kini sa duha ka lalaking sakay sa motorsiklo nga nangutana pa kung duna sila’y baligyang baboy nga litsunon dayong pusil sa duha niini ka tiil.
Misulay pa pagdagan ang biktima apan nasukarap kini ug dinhi na misulay pagluwas kaniya ang bana apan gibaharan kini sa gunman nga dili manghilabot ug gitiwasan pagpusil sa nagkada-iyang bahin sa iyang lawas ang biktima hinungdan sa iyang kamatayon.
Nakuha gikan sa dapit nga nahitabuan ang pito ka basiyo sa .45 nga kalibreng pistola samtang padayon pang gisuta sa kapulisan ang motibo ug ang responsable sa kremin.
Sayran nga natigayon usab ang pagpusil-patay ning mi-aging alas-6:20 sa gabii sa Purok 2, Brgy. Anticala ning siyudad sa Butuan. Sa paighinabi ning sibyahan, gi-ila ni PCaptain Charles Evan Gatchalian, station commander sa Butuan City Police Station 4 ang biktimang si Alma Nalugon Pajaron, 51-anyos, mag-uuma, residente sa maong dapit.
