BUTUAN CITY – Mitala og sunod-sunod nga pagpamusil ang siyudad sa Butuan kagahapong adlawa nga mikalas sa duha ka mga bikima samtang wala pa maila ang mga suspetsado.
Unang gitaho ang insidente sa pagpamusil pasado alas 7:30 sa buntag sa may P-2, Barangay Pianing, Butuan City diin ang biktima nailang si Jesus Macales Luad, 39-anyos, olitawo og residente sa maong dapit. Sa impormasyong nakuha gikan sa Butuan City Police Station-4, kauban sa biktima ang iyang inahan nga si Juana Luad sa pag-abot sa ilang panimalay og sa dihang kalit nga miabot ang mga suspetsado bitbit ang mubo nga klase sa armas og giti-onan ang biktima.
Pugsanong gidala ang biktima ngadto sa kilid sa ilang panimalay og didto gipusil sa makadaghang higayon nga maoy hinungdan sa iyang kamatayon.
Samtang pasado alas 6:30 sa buntag sa dihang nadiskubrihan ang laing biktima sa pagpamusil sa may P-5 Brgy. Lemon, Butuan City. Naila ang biktima nga si Sulpecio Duliguez Guibao Jr. 58-anyos, dunay kapuyo nga residente sa P-14, Brgy. Mahay, Butuan City.
Sa inisyal nga imbestigasyon sa Butuan City Police Station-1, niadtong lunes sa alas 5:00 sa buntag sa dihang miadtu sa iyang basakan ang biktma og wala na kini makauli hangtud nga nakita nalang nga nagbuy-od sa kasagbutan og wala nay kinabuhi diin dunay duha ka samad pinusilan sa dughan og laing duha ka samad sa tiyan.
Base sa pagsaysay sa witness, alas 5:30 sa buntag niadtong lunes sa dihang dunay nadungog nga mga buto sa armas nga nagsumikad sa nahimutangan sa biktima.
Sa karun, padayon pang gipalawman sa kapulisan ning siyudad ang ilang imbestigasyon aron matumboka ng motibo sa nasangpit nga pagpamusil og mailhan og madakpan ang mga suspetsado.
