BUTUAN CITY – Mitahan na ngadto sa iyang mga kadagkuan sa 23rd Infantry Battalion, Philippine Army ang sundalong nakapusil-patay sa usa ka amahan atol sa Father’s Day celebration kagabii samtang ang iyang ka-uban usab ang nakapusil-patay sa anak sa biktima.
Naila ang mga biktimang sila Marcos Yonson, 62-anyos ug anak niining si Bernard, 36-anyos, parehong residente sa District 2, Brgy. Ata-Atahon, Nasipit, Agusan del Norte.
Base sa inisyal nga imbestigasyon sa kapulisan sa maong lungsod, nagtambay matud pa sa waiting shed duol sa ilang panimalay sila Bernard uban ang igsoon niining si Jay ug usa ka Jerome Librado hapit na alas-dies kagabii dihang miduol matud pa kanila ang lalaki ug nangutana kung unsa ang pangalan sa maong lugar apan wala kini matubag ni Jerome sa rasong midayo lang usab siya kansa gikasuko sa maong lalaking kinsa sa kaulahian, gi-ilang si Dante Aquino, 34-anyos.
Mibalik matud pa ang suspek sa iyang ka-uban samtang ang amahang si Marcos, mi-uban sa iyang mga anak sa waiting shed ug dihang mibalik na ang milakaw nga lalaki, dinhi niya gipusil si Marcos sa makadaghang higayon.
Dihang nakita kini sa anak nga si Bernard, dali niining gilayog ang gunman resulta sa ilang pagkatumba apan miduol kanila ang ka-uban ni Aquino dayong pusil usab kang Bernard sa makadaghang higayon adiser nanibat.
Gidala pa sa ospital ang mga biktima apan gideklara kining dead-on-arrival sa attending physician.
Sa eksklusibong interview sa Bombo Radyo Butuan, gipadayag ni police provincial director Col. Martin Gamba nga Migawas usab sa inisyal nga imbestigasyon nga naka-inom nang daan ang mga biktima samtang padulong pa sa iyang duty ang suspek sa barge diin kini gi-detail.
Alayon niini, mi-apela si Col. Gamba ngadto sa tanan nga likayan ang pag-init sa ulo aron dili makakita og lalis sa ingon malikayan ang ingon niini nga panghitabo.
Gitu-uhan sa opisyal nga gamay ra ang hinungdan sa maong hitabo apan tungod kay duna’y naka-inom rason nga dali rang mi-init ang ulo ug misangpot nga ngilngig nga kremin ang unta pagpatuod lang sa sundalo sa dalan nga angayan unta niyang subayon.
