BUTUAN CITY – Mitambag ang usa ka sundalo nga miyembro sa tribong Banwaon ug lakip sa napiling Outstanding Filipino sa tuig 2017, ngadto sa iyang kaigsoonang nahisalaag sa laing dalan, nga paladpan ang panghuna-huna.
Sigon ni Staff Sergeant Narding Pascual sa 26th Infantry Battalion, 4th Infantry Division, Philippine Army nga nakabase saTalacogon, Agusan del Sur, dili lang magpukos sa unsay gisilsil sa ilang alimpatakan sa walhong grupo, nga migamit lang kanila nga mga hinang-giban.
Mas maayong maminaw usab sa mga programa sa gobyerno aron sa ingon matimbang-timbang kung asa dapit ang kamatooran ug tinood nga demokrasya. Kini aron makab-ot ang gitinguhang kabag-ohan.
Kung mahinumduman, si Staff Sergeant Pascual, nga taga San Luiz, Agusan Del Sur, usa sa mga napiling Outstanding Filipinos ning tuiga sa pribadong foundation tungod sa iyang pagtabang sa mga kumunidad diin siya madestino, labi na sa mga kaigsoonan niya sa Tribong Banwaon.
Apil sa mga kongkretong natabang niini ang gitukod nga eskwelahan alang sa iyang katribu diin bag-ohay lang giturn-over na kini sa Department of Education kon DepEd.
Una nang gipahayag sa sundalong awardee nga wala siya nagdahum nga mapiling Outstanding Filipino tungod kay ang iyang battalio commander lang ang nagduso sa iyang mga accomplishment nga maoy gibasehan sa nakab-ot nga pasidungog.
Gipaneguro nalang niini nga magpadayon siya sa kinasing-kasing nga pagserbisyu.
Nasayrang ang matag awardee sa maong pribadong Outstanding Filipinos, makadawat ug usa ka milyon ka pesos, bulawang medalya ug tropeo.
