BUTUAN CITY – Gipasakaan na og kasong duha ka ihap sa kasong murder ang usa ka sundalo nga natumbok nga maoy responsable sa pagpamusil sa lungsod sa Nasipit, Agusan del Norte nga mikalas og duha ka mga indibidwal samtang laing usa ang angol.
Sa esklusibong pakighinabi ning sibyahan, gibutyag ni PMajor Ma. Divina Gracia Laspoñas, officer-in-charge sa Public Information Office sa Agusan del Norte Police Provincial Office, nga kini human mitahan sa Nasipit Municipal Police Station pagka-Dominggo sa gabii ang responsableng si Corporal Giovanni Octavio, nadestino sa 23rd Infantry Battalion, Philippine Army nga nakabase sa Brgy. Sta. Ana sakop sa maong lungsod.
Madumdumang on-the-spot nga namatay sa maong hitabo si Alj Regino Cañete, 24 anyos, estudyante samtang namatay usap human sa operasyon ang higala niining si Alden Pescante Jr., 34 anyos, ulitawo, parehong residente sa Brgy. 5 sakop sa maong lungsod ug nagpabilin pa sa ospital ang na-among nga driver.
Managlahing rason ang mitumaw sa ilang gihimong imbestigasyon tali sa mga nakasaksi sa panghitabo ug sa panig sa suspetsado.
Apan mi-angkon matud pa ang sundalo nga iyang na-apil pagpusil si Pescante nga igo rang mi-apartar niadtong higayuna samtang nadamay lang ang driver nga mi-agi sa dapit nga nahitabuan.
