BUTUAN CITY – Nagpadayon karon ang clearing operations nga gihimo sa kasundaluhan sa mga lugar nga posibleng gisibatan sa gibana-banang napulo ka mga rebeldeng New People’s Army kon NPA human ang engkwentro nila ning mi-aging alas-singko sa hapon sa Brgy. Mahaba sakop sa Cabadbaran City, lalawigan sa Agusan del Norte.
Sumala ni Capt. Al Anthony Pueblas – Civil Military Operations kon CMO officer sa 402nd Brigade Philippine Army, ang maong engkwentro miresulta sa pagkamatay sa sundalong si Sgt. Danilo Panganiban taga-Brgy. Patag sakop sa Cagayan de Oro City og sakop sa 29th Infantry Battalion, Philippine Army.
Gika-ingong nakadawat sila ug report gikan sa mga sibilyan mahitungod sa presensya sa walhong grupo.
Gawas pa kini sa pagpakitabang sa contractor sa gimugna nga farm to market road sa Brgy. Tagbungabong lungsod sa RTR tungod kay gipangayoan matud pa sila ug revolutionary tax sa mga rebelde hinungdan sa gilusad nga security operations.
Sigon ni Capt. Pueblas sa gilusad nga clearing operations sa encounter sight nasuta ang daghang pat-ak sa dugo kansa timalhan nga dunay casualty sa walhong grupo.
Gihikay na usab nila ang mga dokumentong kinahanglanon alang sa mga benepisyong angayang dawaton sa na-ilo niyang pamilya. (Beth Ruiz)
