BUTUAN CITY – Napakyas ang plano sa House of Representatives sa Estados Unidos nga limitahan ang gahum sa gubat ni Presidente Donald Trump – usa ka adlaw ra ang nilabay, human nga unang napakyas ang susamang paningkamot sa Senado.
Ang resolusyon nga giduso sa kadaghanan sa mga Demokratiko, napildi sa boto nga 212 kontra sa 219. Adunay pipila ka mga Republikano nga mi-uyon sama nila Thomas Massie ug Warren Davidson, apan adunay mga Demokratiko nga miboto og supak sama nila Henry Cuellar, Jared Golden, Greg Landsman ug Juan Vargas.
Kung napapasar pa, pugson unta ang presidente nga mangayo og pagtugot sa Kongreso aron ipadayon ang aksyong militar batok sa Iran.
Ang Konstitusyon klaro nga nagsulti nga ang katungod sa pagdeklara og gubat anaa sa Kongreso apan gibutyag ni House Speaker Mike Johnson nga ang US wala sa gubat batok sa Iran, ug ang aksyong militar limitado ra.
Kadaghanan sa mga Republicans supak sa pagpugos sa limitasyon sa gahum sa presidente sa giyera batok sa Iran.
