BUTUAN CITY – Gibalibaran sa mga sakop ni Jorgeto Santisas ang subpoena nga gisilbi kaniya gikan sa Prosecutor’s Office sa Surigao City niadtong Martes, Pebrero 18, 2025.
Ang subpoena may kalambigitan sa kasong Large Scale Illegal Recruitment ug gisilbi kini sa ilang kampo nga nahimutang sa Purok 5, Barangay Sabang, Surigao City. Gihinganlan usab sa subpoena ang laing akusado nga nailhang si Alyas Dodong Santisas.
Si Santisas giila nga usa sa mga lider sa peke nga Indigenous People kon IP organization nga gitawag og Federal Tribal Government of the Philippines kon FTGP, nga nalambigit sa pag-lockdown sa pipila ka mga negosyo sa Surigao City sa miaging buwan.
Ang National Commission on Indigenous Peoples kon NCIP ug ang mga lider sa IP sa Caraga Region mideklarar nga ang FTGP usa ka dili lehitimo ug peke nga organisasyon.
