BUTUAN CITY – Opisyal nang gideklara ang state of Calamity sa Siargao Islands og Bucas Grande Islands sakop sa probinsiya sa Surigao del Norte human na-aprubahan ang girekomenda sa Provincial Disaster Risk Reduction and Management Council (PDRRMC) atol sa ika-116 ka regular session sa Sanguniang Panlalawigan kagahapon sa hapon.
Base sa resolution number 502 series of 2024, nag-motion si provincial board member Kaiser Recabo Jr. nga ipailalom sa state of calamity ang nasangpit nga mga isla nga gisegundahan sa tanang mga board members nga nakatambong.
Kini isip tubag sa nagpadayong power outage tungod matud pa sa pagkadaot sa submarine cable nga nagkonektar sa Siargao Island ngadto sa Mindanao power grid.
Tumong sa maong deklarasyon nga mapagawas ang emergency funds og maseguro ang paspas nga pagpadala sa importanteng suporta sama sa tubig mainom sa apektadong kumunidad.
Magpakusog usab kini sa lokal nga kagamhanan nga mag-implementar og lakang isip tubag sa mga hagit sa ekonomiya og uban pa nga apektado sa taas nga pagkawala sa sugang dagitabnon.
